wala pang pamagat.

[isang tulang tuluyan]

Nakatikim ka na ba ng coke na sobrang lamig? Yung tipong kahit walang yelo e ayos na? Yung tipong humahagod sa lalamunan at masakit sa ilong pag dumighay ka? Ako oo, at iyon ang pinakamalapit na bagay na nagawa ko sa paglalasing. Masakit uminom ng coke na sobrang lamig. Parang tinutusok ang dila mo, ngalangala at lalamunan. Mararamdaman mo ring puputok na ang iyong tiyan sa hangin.

Ang pag-inom ng coke ang pinakamalapit na bagay na nagawa ko sa pag-ibig.

Masarap, kahit masakit. Gusto mo pa ring inumin kahit na alam mong mangingiwi ka sa bawat lagok. Sa katunayan isang lagok nga lang ang kaya ko sa bawat pag-inom.

Masarap ang coke na sobrang lamig.

Masakit ang coke na sobrang lamig.

Pero pag naratnan mo na ang ilalim ng baso, aabutin mo pa rin ang bote at pupunan ito.