malaya na si hiraya

[utos ni tete na ipost ang lahat ng mg tulang ipinasa ko.ayun.ito,si teacher cora,absent po ma'am at yung wala pang pamagat.]

Madilim ang paligid ng selda ni Hiraya, ¹

malamig ang sahig at siya’y nag-iisa.

Tanging ang buwan lamang ang nakakasilip

ng kung anong hiwag

ang mayro’n si Hiraya.⁵

Ang mahaba n’yang buhok

na umaagos sa kanyang balikat,

ang makulay n’yang damit

na tumitingkad pang lalo sa gabi

Ang ganda n’ya. Ang ganda ni Hiraya.¹⁰

Buong araw naghintay si Hiraya

sa lamig at dilim ng kanyang selda

hinihintay na buksan

ng liwanag ng buwan

ang munting kandadong¹⁵

hadlang sa kasiyahan.

Ang munting kandadong pumipigil sa kanya

Na pintahan ang mundo ng mga kulay nya—

Ang mundo ng panagimpan

At walang hanggang pangarap²⁰

Walang sigla,walang saysay, kung wala si Hiraya.

At ngayong bilog ang buwan

at lahat ay tulog na

at lahat ay naglalakbay

na sa mundo ni Hiraya,²⁵

siya’y malaya na muli

at higit na umaassa

na siya, at ang mga kulay nya

ay maaalala sa susunod na umaga.