pano naman kami
pagdating ng census?
saan ididikit ang sticker,
sa ilalim ng tulay,
sa gilid ng kariton?
paano naman kami
kapag suspended ang pasok?
e ni minsan nga,
di pako nakapagklase.
pano naman kami
sa elasto-seal commercial
e walang bubong
kaming tatapalan?
pano naman kami
pag bumaba ang presyo ng gasolina
e ni susi ng kotse
di pa nakikita?
pano naman kami
pag summer at init na init na
sa aircon ng supermarket
ipinagkakait pa.
pano naman kami
pagdating ni santa
saan nya iiwanan
ang hiling kong panghapunan?
pano naman kami
ni hindi namin nalalaman
na may mga taong nagsusulat pala
tungkol saming kalagayan?
pano naman kami
pag misa ng bayan
pati bahay ng Diyos
di namin pwede tapakan?
pano naman kami
samin lahat bingi
at walang nakukuha
kundi mga gan'tong tula?
No comments:
Post a Comment